Kunshuro yambere mu Rwanda habaye irushanwa ryo gusiganwa ku magare, ryahariwe abari n’abategarugori gusa (Women Race)

Ku wa 24 Gicurasi 2025, mu Karere ka Rwamagana habereye irushanwa ryo gusiganwa ku magare ry’abagore gusa, ryiswe Women Race, rikaba ari  ubwa mbere mu mateka y’u Rwanda.

Iki gikorwa cyateguwe ku bufatanye bwa Learn Work Develop (LWD), AHF Rwanda, AHF Global, Plan International Rwanda, Akarere ka Rwamagana, ishyirahamwe ry’umukino w’amagare mu Rwanda (FERWACY), hamwe n’abandi bafatanyabikorwa.

Amakipe menshi y’abakobwa baturutse mu bice bitandukanye by’igihugu yitabiriye irushanwa, barimo n’ikipe ya Bike for Future LWD Cycling Team.

Ni igikorwa cyitabiriwe n’abayobozi batandukanye barimo n’Umuyobozi w’Akarere ka Rwamagana n’abandi bo mu nzego zitandukanye.

Uretse irushanwa, iki gikorwa cyabaye n’umwanya wo gutangiza umushinga mushya wa Healthcare Cycling Project, ushyirwa mubikorwa na LWD ku nkunga ya AHF Rwanda na AHF Global. Uyu mushinga ugamije kuzamura urubyiruko, cyane cyane abakobwa bafite ibibazo by’uruhurirane, binyuze mu masomo yo kwihugura mu myuga itangirwa muri LWD TVET Center ariyo: ubukanishi bw’amagare ya siporo, ubudozi ndetse no gusuka.

Hanamuritswe kandi gahunda ya Masenge Mba Hafi “Please Aunt, Be Closer to Me” igamije gufasha urubyiruko rufite ibibazo by’uruhurirane, binyuze muri Safe Spaces (Urubohokero), aho urubyiruko rwitabwaho na Masenge ndetse na Mukuru w’Abakobwa. Abo bajyanama babatega amatwi, bakabaganiriza, kandi bakabafasha kwigobotora ibibazo bafite mu bufatanye n’inzego z’ibanze.

Mu ijambo rye, Umuyobozi wungirije ushinzwe imibereho myiza y’abaturage mu Karere ka Rwamagana, Madame Umutoni Jeanne, yagize ati:

“Turizera ko gahunda ya Masenge Mba Hafi izagira uruhare rukomeye mu kurwanya inda zitateganyijwe mu bangavu. Turasaba urubyiruko kuza kwitabira izi safe spaces, kuko ari amahirwe yo kwiga, gukora, no gufashwa kwikura mbukene.”

Bwana Jean Claude Mwiseneza, Umuyobozi Mukuru wa LWD, yagarutse ku ruhare rwa gahunda ya Masenge Mba Hafi ati:

“Gahunda ya Masenge Mba Hafi  (Please Aunt, Be Closer to Me) ni urugero rufatika rw’uko ubufasha buva mu muryango n’inzego z’ibanze bushobora guhindura ubuzima. Iyi gahunda ntigamije gusa gutanga ubujyanama, ahubwo igamije no gufasha umwana n’umubyeyi we gusubira hamwe mu nzira y’uburere n’ubuzima bwiza. Dufite icyizere ko binyuze muri Masenge na Mukuru w’Abakobwa, dushobora kugira urubyiruko rwiza, rufite amahitamo, kandi rushoboye kurengera ejo hazaza harwo.”

Iyi gahunda ya Masenge Mba Hafi yatangirijwe mu Murenge wa Kigabiro, biteganyijwe ko iyi gahunda izakomereza no mu yindi mirenge igize Akarere ka Rwamagana, hagamijwe kwigishwa, no gufasha urubyiruko rufite ibibazo by’uruhurirane.